Tarikan Ikan Monster pertama kali Di Godong Ijo Cinangka

Hari/Tanggal : Kamis / 08 Desember 2011
Nama Angler : Aye sendokir
Rood : Tackledojo
Reel : Shimano Sienna 4000FB
Line : PE-4
Nama Kolam : Godong Ijo
Alamat : Cinangka – Depok
Jenis Kolam : Kiloan, Tarikan, Jackpot
Jenis ikan : Banyak
Perolehan : 1 ekor Jenghis Khan dengan berat kira2 28 kg

Jam 13:35 ari kemis, lagi upleg2nye ngelap papan tulis…ade japri masup…. dari dedengkot Empan DJEMPOL nyang ude terkenal Maknyuusss entu.
“jadi mikut kagak jam 14:00 brangkat ke Godong Ijo”
aye langsung bales “siap…..tungguin ye”
dibales lagi “brape lame, naek ape”
aye jawab “palingan 30 menit, naek kude besi”
dibales “oke deh ditunggu…awas telat…!!!”

buru2 aye slesein ngelap papan tulisnye..sembari mesen ame bocah2….kerjain nyang en ni ye…minggu depan kite liat lagi asilnye, abis entu pade bubaran gi dah….!!!
langsung masupin jari2 kemesin absen….pake jaket pasang sarung tangan ame slesepin pale ke helm…..seeerrrr….tancep ke Bintaro.

Nyampe Bintaro jam 14:20, ude ditungguin….tapi masing dikasi minum juge sih…nih buat ngilangin aus….mayan…..trus brangkat duduk manis disebele kiri, ditenge jalan Kang Ito brenti beli anak nyimas, “en ni anak nyimas nyang rade gedean brokap…???”
dijawab ame nyang jage toko “‘kal apaan Om…”, aye nyeletuk “kal mancing”, “waduh jangan nyang en ni, en ni pan ikan hias, nyang en ni aje” sembari ngunjukin anak nyimas nyang kecit2, Kang Ito bilang “kagak nyang entu aje nyang gede2, atunye brape..?”, “due setenge” kate nyang jage toko, “ya udah deh beli enem biji, nih lime belas rebu”, aye nyeletuk “lime belas rebu lapan biji ye…”, “wah kagak dapet Pak” nyaut nyang jage toko sembari nyerokin anak nyimas…trus dikasi oxy, aye nanye lagi “brape biji tuh “, jiye ngejawab “tujuh, aye bonusin atu”.

Nyampe lokasi ‘kul 15:30, ude ditungguin ame Pak Harry en reporter majalah mancing di gubuk pertame deket pintu masup, digubuk kedue ade Om Heru(member FF nyang kelamaan ngumpulin dokat di borneo) nyang lagi ngejajal en surpey GI ‘kal acare kantornye, salam2an….Pak Harry langsung nyeletuk “ngape tlat…cobe dateng sepulu menit lebi cepet…bakal ngerasain ikan 28kg, nih fotonye, sembari ngasongin kamera…set dah bikin jadi tambe ngiler…buru2 dah ngeset Tackledojo nya Kang Ito, Pak Harry langsung in-action lempar-tarik/casting….due kali lempar ade samberan….gubraakkk…ceelll….mocel….beturut-turut tige kali samberan tige kali mis-call, aye ngomong Pak Harry mending koncer aje deh, jiye manggut2 sembari lempar empan berikutnye..aye juge mikut ngelempar trus tegerin joran. Kang Ito sesuai ame misinye masang fish-finder trus naek getek ‘kal nyari joran2 nyang pade kecemplung.

Lagi upleg2nye ngobrol ame Pak Harry….tackledojo nukik tajem banget……..aye samber…trus cobe ngerahin tenage sembari ngebayangin bakal fight nih….yaaahhh…kagak ade perlawanan..kagak nyampe semenit Mpok Lela 6kg nyerah(over kill kali ye…tackledojo dipasangin Sienna 4000FB), rilis dah trus lempar lagi, ngelanjutin ngobrol ame ngudut.

Sejam kemudian Kang Ito balik sembari ngomong “kagak kedeteksi….semuenye rate”
trus biola kasting dah…lempar tarik…lempar tarik….nihil tuh….trus Kang Ito bilang ame aye “kalo pengen strike ke pojokan gi dah deket pintu aer” aye nurut sembari bawa arsenal kepojokan…..mulaen lempar-tarik…empat kali lempar-tarik…bheerrr..ade samberan…aye dongakin joran dikit…eiiit monscel…..ceeeell….balik lagi ke gubuk atu, abisan empan adenye disono..eeehhh ude ade Pak Chandra(Sang Pemilik Godong Ijo yang ramah banget en bersahabat/kagak bossy pdahal kokay nye aujubille), chit-chat bentaran trus Pak Chandra ngomong “ayo dong katenye pengen strike nyang gede, usahe ngape”.

Kang Ito ngambil inisiatip kasting lagi…..nihil…akhirnye joran diserahin ame Endra(pegawe Godong IJo), “Dra kasting gih ude ‘kul 6 kurang sprapat nih waktunye ikan kemek”. Kagak nyampe lime menit, lagi upleg2nye kite ngobrol Endra treak…straikkk…!!!!

IMG01320-20111215-1736aye buru2 nyamperin ambil alih entu joran……Endra ngasih arahan…jangan ampe kendor…jangan ampe kendor…..bujug dah…ril ngejeriiittt…….. Om Heru nyang ngedampingin aye….nanye…berat kagak Om…sembari konsen ke arah larinye PE aye ngejawab “wuuuiiiddiiihhhh….mangteebbbb….!!!”, Om Heru ngeluarin duit gobanan segepok “Om tuker ye ame en ni” sembari ngasongin tuh gepokan, aye kate “tambahin tige gepok lagi juge ogaahhh…” sembari aye pompa entu tackledojo..eiit rade nurut nih ikan….ade kire2 enem gulungan… ikan balik nyungsep lagi……riiittttt ril ngejerit lagi…. en ni kali ditarik terus nyampe keujung, aye masang kude2 “aji gelap ngamparnye Mahesa Djenar/telapak kaki kanan melintang ame telapak kaki kiri sejengkal didepannye ngebentukIMG01321-20111215-1737 sudut 90 derajat” aye empos semangat/tenage dalem aye kerahin kire2 enem bagian aje, sepuluh menit lewat….aye masing bekutet…..riillll kagak brenti2 ngejerit……lime menit lewat lagi….

aye tambahin tenage jadi 7 bagian…..aye ngomong ame Om Heru…en ni kali aye kagak kasih ampun dah….palingan jebol en ni ril atawe patah ni tackledojo…..minggir juge tuh iwak….set dah…gueeedeee bangeeeetttt…..!!!!

IMG01326-20111215-1739Kedi nyiapin serokan….. fight lagi dipinggiran…. aye kasih sodokan uler matok…..lime menit fight dipinggiran..masup juge entu ikan dalem serokan, trus narsis dah dipoto-poto in ame Pak Harry, Kang Ito, rilis dah entu ikan….
Puaaasssss….puaaaassssss…….. mekasi Kang Ito, Mekasi Pak Chandra…. ngimpi aye kesampean….

Leave a Reply

Your email address will not be published. Required fields are marked *


*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>