Umpan Djempol + Telur Puyuh.

ari sabtu 20 agustus 2011, ade BukBer & Sahur Bareng DI TL, tapi aye ade tahlilan 40 ari wafatnye mertue, jadi kagak bise dateng sesi atu, nah pagi-pagi nganggur, daripade bengong mending ke empang P&K aje deh, en ni jalan ceritenye:

Abis sahur, nunggu subuh buka milis…sepi…….sepi…..!!!!! abis subuh ngeracik empan dah:

Jempol-7adonannye kayak gini nih :
1/2 bungkus Umpan Wangi + Biang Susu Jempol
1/2 bungkus Umpan Amis + Crystal Jempol
30 butir telor puyuh
3 sendok makan kacang mede
3 cm keju kraft (keju kraft potong jadi 6 bagian)
kocok lepas pake kocokan telor jadul
kalu ude nyampur siapin loyang masupin 3 lembar daon pandan
tuang deh ntu adonan kedalem loyang terus kukus 30 menit.
sembari nunggu empan mateng pegi beli kroto 2 ons ame deho 1 kaleng.
kroto dikukus, deho ame minyaknye diblender ampe kayak eek bayi.
kalu adonan ude mateng matiin kompor, buka kukusan bakal ngedinginin empan ame kroto(tujuannye biar endapan aer nguap).
tarok blenderan deho dalam baskom, masupin empan aduk sampe rate.terus masupin kroto kukus aduk lagi, pan jadinye rade lembek.
nah sise empan jempol nyang amis pake deh bakal ngerasin mpan.
kalu pengen mpan rade perak(gampang buyar kalo kena aer) pas ngaduknye jangan kelewatan diteken tapi diteken ale kadarnye aje.
kalu pengen mpannye pulen(rade lengket) ye ngaduknye teken pake tenage. nah mpan ude siap.

kul 8:00 meluncur ke parung serab(empang P&K) nyampe lokasi cume ade atu pemancing, set dah bijimane nih…..tapi H Mancuk(pemilik empang) ngomong berape orang aje jadi, kagak use khawatir, kul 9:00 mulain nyang pade dateng walhasil ade 8 orang, diundi deh, aye dapet lapak 28, wah ngalamat panen nih…..!!!!!

Bener aje aye bise naekin ….kagak tanggung-tanggung….54(lime puluh empat ekor) ikan rame/sekilo tige ame sekilo due ples atu super banci 1,58 Kg, kagak juare sih abis ketiban ame nyang 1,64Kg(juarenye tunggal doang), tapi en ni ati puas banget dari mulain setat ampe kul 4:00 sore gentak teruuuuussssss……!!!!!!

Ohhh…iye…….aye ude bekali-kali make kumpusisi empan kayak diatas dan hasilnye kagak ngecewain…..aye sengaje share en ni empan biar sudare-sudare aye semue bise ngebuktiin.

Kagak lupe aye ngucapin mekasi ame Yang Mahe Kuase. Terus aye juge mekasi banyak ame Kang Ito selaku penggagas dan produsen empan DJEMPOL…..Kang…..pertahankan komposisi empannye…..selaen jadi produsen….Kang Ito juge ikut berjase ame sudare-sudare kite nyang make dan ude behasil ngebuktiin saktinye entu empan….(asal bener ngadonnye).